吉林
10月1日，广州最逼嘅地方，唔系平时嘅北京路同永庆坊。竟然系啱啱开业第二日嘅白鹅潭万象城，商场多人到好似蚁窦咁！
9月30日先正式开门，10月1日就 "人从众"，连商场自己都讲："感觉全世界都来了白鹅潭。"
有几夸张？
隔离芳村地铁站单日进站 9.3 万人次，客流冲上全线网第二，净系低过广州南站。
茶颜悦色、古德墨柠两间广州首店茶饮，排队时间超过5个钟，单人单次限购 2 杯，间间食肆门口都排满晒人。
下昼芳村地铁站要限流、部分列车飞站，周边道路要封路疏导，连10月1至3号嘅灯光秀都要取消，人多到超出官方控制范围。
其他街坊游客同日行开北京路、永庆坊，就话体感上 "争食咗"，冇往年国庆头几日咁逼，可以慢慢行唔使人ong人。
点解万象城可以一开场就抢晒镜？
第一：新场效应
首店扎堆、新鲜感爆灯，广州人出名 "边度新开就去边度"。
第二：客路唔同
外地游客照旧去北京路、永庆坊打卡老广州；留低嘅本地街坊，就一家大细拥晒去新商场行街街、试新店。
第三：天时着数
假期预报有雨，室内商场自然更稳阵。
不过，一日半日嘅数据，唔使太早上脑。
开业尝鲜期一过，万象城会回归常态。北京路、永庆坊有外地客同老街味道做基本盘，客流唔会因为一个新场就散。
讲到底，广州商圈由 "几个老大哥独大" 变成 "多点开花"，街坊选择多咗、逼拥嘅地方仲可以分流，唔系坏事。
国庆第一日，你去咗边？逼爆万象城，定系屋企躺平？
#国庆节##万象城##白鹅潭##旅游##假期#
特别声明：以上内容(如有图片或视频亦包括在内)为自媒体平台“网易号”用户上传并发布，本平台仅提供信息存储服务。
Notice: The content above (including the pictures and videos if any) is uploaded and posted by a user of NetEase Hao, which is a social media platform and only provides information storage services.
